Dahamm und Anderswo
Deil 5: Frankn lichd hald am Meer
Für Helmut Haberkamm
Frankn lichd nedd am Meer,
hodd anner gsachd, den i kenn,
der Schbruch is geniool,
der is ä Ohrnhöllerer, wennnsd nänn lässd,
der is ä Roggsong,
der si vo allaans durch di Bludbohn bumbd,
des is ä Sadz zwischn dunkl und siggsd-mi-ned,
wenn di Welln kummer
und über Nämberch zammschloong.
Ä Sadz, der nix sachd, obber alles maand,
wenn dä Sinwelldurm widder ä Leuchddurm gworn is,
ä Sadz, der di ned looslässd, wennsd droom bisd,
am Meer.
Doo hoggsd dann,
mied deim Frankn im Ruggsagg,
mied demm Gruch vo dä Schdadd und vom Land
und schausd. –
Hindn am Horizond
siggsd manchmool änn klanner Dambfer,
doo is sicher aa anner drin
vo anderswo.
Alle sinn immer vo anderswo.
Desweeng lichd Frankn am Meer,
desweeng wohner mir alle am Meer,
desweeng hoggn mir alle aff anner Burch
ass Sand.
Dann werds kold,
droom an dä Wooderkand,
dann gehsd hamm, mied anner salzin Lufd
in dä Noosn,
ä Lufd wie gmoold
vo amm, der Bylder gmoold hodd
dief drundn, woosd herkummsd, woosd bisd.
Frankn lichd hald am Meer.
Des is scho immer am Meer gleeng.
Mä sichds hald ned immer.
Obber wos dussdin oo.
Es reichd ja aa, wemmers riechd.
