Wos mei Oma dä Weld schon nu mieddeiln wolld
Deil 1: Geld allaa machd ned glügglich
»Edz schdellds aich vor, wos iich gesdern dräumd hobb. Iich hobb Loddo gschbyld – iich, wo ich nie so ä Woar mach – und gwunnä: hunderdachdzich Millionä.
Do binni glei zum Opa und hobbs nänn gsachd, obber ihm aa soford gschdeggd: ›Opa, Geld allaa machd fei ned glügglich!‹
Im Wohnzimmer hammä uns nacherd hieghoggd und überleechd, wos mä machn, mied unsere Millionä. Hergehm wolld mäs scho, obber hald aa ned, dass die dann nix mehr dennä, walls alle reich sinn und edz maanä, dass blouß nu aff ihrer faulen Haud liehng könnä. Also hammä die Hälfd gschbend, an die Armä in dä Driddn Weld, und dann nu amol ohgfangd zum Überlehng.
Edz warens obber immer nu nainzg Millionä, also hammä widder die Hälfd gschbend, und so is des zugangä, bis nur nu rund sechs Siehmschdelliche affm Kondo gewsn sinn.
Endli hammä ausdeiln könnä, wie mä gwolld hamm. Kanner hodd sei Ärberd aafgehm und die Kindä und Enggälä sinn normol bliehm.
Ja, ja, Geld allaa machd ned glügglich. Obwohl – wie iich aafgwachd bin, hobbi mi drodzdem gärcherd. Die häddi hald doch gern klimpern hörn, die sechs Millionä zum Schluss!«