In maaner Eingschafd als Zivi.
Dexde zum Dehma Budzn.
Deil 2: An di Donnersdooch in dä Frähi um elfä
An die Donnersdooch um elf binni immer bei anner Nainzgjährichn tädich, für anderdhalb Schdund. Mei Läiber, dey nimmd di her! Do hasd Bad budzn ned einfach durchwischn, sondern Glo, Wannä und Schbiegl saibern. A des Schdaubsauhng is ned des Übliche. Do moussd alle Möbel wechruggn und ganz hindn in die Eggn neikummä. Dann gibbds dä änn Einkaufszeddl, wousd goar ned auf die Idee kummsd, die Kilo, diesd vom Ladn widder hamm schlebbsd, auszurechnä. Drodzdem schaffsd däs meisdens in ä Schdund, dassd mit allem ferdi bisd.
Dann schdrahls di oo, kochd Kaffee und schdelld Blädzlä am Diesch, obber nix kaffds, selber baggne.
Sie fängd äs redn oo und du redsd mied und merksd, dass di Fraa nu am Lehm is. Sie erzähld dä vo ihrm Moo, der seid dreißg Johrn undä dä Erdn lichd und wie archs verliebd woar in ihn, zu Anfang. Sie schbrichd vo ihre Kindä und Enggala, wo bald nu ä vierds unterwegs is, und du wundersd diich, dass die so zufriedn is, drodz der Schiggsahlsschlääch im Kriech und dem Krebs vo ihrm Moo, der schließli änn seim Doud schuld woar.
Schbäder erzählsd selber äweng wos von dir und sie horchd dä zu, drauerd mit dir, dass dei Fraindin Schluss gmachd hodd, wousd doch dachd hasd, des klabbd mit derer wie mit kanner andern vorher, und hodd immer wos dozou zum Sohng. Aber nix Gscheids – wos Netts.
Und dann is widder rum, die halbe Schdund. Und du fraisd di über des Drinkgeld von anner Margk mehr als über die zehn Margk, diesd von derer andern Fraa griggsd, wousd blouß zehn Minuddn wos eikaufen dousd und widder in Bus neischdeigsd und zur Zendrohle fährsd.
