In maaner Eingschafd als Zivi. Dexde zum Dehma Budzn.
Deil 7: Bamm besdn Willn
Irchendwi merksd däs, das wos ned schdimmd. Sie sinn figgrerder wäi di andern. Wennsd aus Versehng äs Kehrschauferlä odder an Besn falln lässd, zuggn die anders zamm und louer manchmol an klanner Schrei los. Villeichd denkns, dass di Hiobsbodschafd ä zwaads Mol zu ihner kummd. Villeichd is asu, wäi wenn für an Aungbligg lang nix bassierd wär, wäi wenns zurüggkehrerdn zu dem Bunkd, ba demsd scho ä Ahnung hosd, obber nu di Gewissheid fehld.
Glei äs erschde Mol hobbi im Herrgoddswinkl des Bildler gsehng. Goud hodder ausgschaud: Ä Moo in di besdn Joahr. Doch iich wolld ned frohng und nix sohng dazou, sondern einfach mei Ärberd dou. Iich hobb ihre Einkäuf gmachd und gschaud, dassi di Sonderangebode dä Wochn kriech, hobb ausnahmsweis di Fensder mied Zeidungsbabier bolierd, obwohl doo di Schdreifm größer wern – und immer hodds mä hinderernooch an Schokolod miedgehm, ä Dofl Zordbidder vo Lindt.
Hammwärds im Bus hamm maane Gedankn nu mied ihr kämbfd. In dem Haus woar ä Schmerz, den hosd richdi gschbürd, der is nämmer vo ihrer wech, aa wennsd nu so ofd über di Fliesn gwischd und di Bladdn am Ofen budzd hosd. Bei der hosd glernd, dassd froh sei kannsd, wenn alles so bleibd, wäis is.
Aa di ledzde Schdund hobbi wäi immer mei Ärberd gmachd und wäi immer wolldi, dass ihrer gfälld, obber aa schnell wech, ford, nämmer zu ihrer hie, walls mä selberd aweng zu arch woar.
Zehn Minuddn vur Feierahmd hodds ihrn Budzaamer eihngmächdich in di Doileddn gschüdd und gfroochd, obi Gluusd aff a Schdügglä Kouhng hobb. Noochdems mä »ä Teelä« eigschenkd hodd, schdeggds mä blödzli an Fuchzger zou und froochd, obbi widder kumm: »Si erinnern miich arch an mein gschdorbner Sohn.«
Iich hobb schneller aafgessn, wäi iich eingli vurghabd hobb. Dann binni aafgschdandn und glei in mei Jaggn gschlübfd. Bamm Abschied hobbis umarmd, obber den Fuchzger dooglouhn.
Dey Verandwordnung hobbi bamm besdn Willn ned drohng könner.
