Dahamm und Anderswo
Deil 11: Bläymobil (odder: Ä Zwedschgermännlä
werd debbressiv)
Iich wär gern amol ä Figur vom Brandschdedder.
Dann deed mi anns in die Händ nehmer
und mied mir schbylln.
Dann deed i wos derlehm aff dä Ridderburch.
Dann wär i werkli doo.
Su schdehsd blooß rum.
Dä Schdaub leechd si aff diich,
ä dünne Schichd, die grauer und immer grauer werd,
und wennsd erschd amol dord bisd,
im Kinderzimmer am Fensderbredd,
weid wech vo demm, wo wos loos is,
schaud di kanns mehr oo.
Di Drachn und Könich, die sinn am Lehm.
Kumm her und hull mi derzu!
Schdegg mä ä Schwerd nei in di aldn Zwedschgn!
Hau mä anne am Deedz!
Zeich mä änn Schadz vom Biradnschiff!
Hau mi rum, zerleech mi,
mach mi ferdi und mach mi ganz!
Obber lass mi miedduu,
aa wenn i danooch nämmer binn!
Iich wyll ned blooß wardn, wardn affs nächsde Fesd,
wo mi ä anders ablöösd.
