In maaner Eingschafd als Zivi.
Dexde zum Dehma Budzn.
Deil 6: Schloofnde Hünd
Immer wenni zu ihrer hiebin, ohm nauf bis in sibbdn Schdogg, hamm di zwaa Daggl vo dä Nachberi drübm äs Belln oogfangd, und erschd widder aafghörd, wemmer ba ihr in dä Küchn drin woarn. Dann hammer uns hieghoggd, blauderd und Kaffee drunkn. Sie hodd mä derzylld, wer im Haus ä Kind grichd hodd, wer mied saaner Miedn im Rüggschdand is und wou die Hermanns, zwaa Schdögg diefer, im Urlaub woarn.
Obber dey hodd ned badschd! Wäi sis gsachd hodd, in suam menschlin Don, hosd gmaand, dey schbrichd vo ihre Engala und ihrm Sohn, dey übrigens am Sunndooch widder ba ihr vurbeikummer. Ball hobbi selberd di Nachbarn wäi alde Bekannde grüßd und manchmol, wenni ihre Wasserkäsdn in Keller und widder noogschlebbd hobb, woari kurz davur, di Fraa Küsder vom driddn Obergeschoss rechds zu frohng, wos edz mied di Haufm Kadzn machd, dey ihr Pederle gworfn hodd, und wäis ihrer Dochder im Abi ganger is.
Vo der hobbi außerdem glernd, dass ä fränkischer Karbfm ä wengerlä wäi ä U sei mou, »wall wenner drinlichd wäi ä brellder Fruusch, konnsd däs glei vergessn«. Dey hodd aa Sädz rausghaud wäi: »Wos nä immer hamm mied ihrer Unschderblichkeit? Des wär mir arch, wenns an mir aa nu im Grob rumzäicherdn!« Und dann hodds glachd und abgwinkd, »wall wer inderessierdn si scho für miich, wenni nämmer bin?«
Dey hodd di Sachn logger gnummer, und iich bin immer beschwingd aus dä Wohnung naus. Blouß aamol hobbi mi ned beherrschn könner. Iich hobb noochbohrd und wolld wissn, ob siss ned aa amol arch gscheid rumhaud und wos ned so schäi in ihrm Lehm gwehn is. Erschd hodds mi redn loaher, doch afferamol is in ä andere Donlooch grudschd und hodd vom Leder zohng, dassd gmaand hossd, mir sinn bamm Barrass. Ganger is um di goude Zeid in di Dreißger Joahr und dass des mied di Judn doch ned so schlimm woar. Mir hamm gschdriedn – und sie hodd gsachd, dassi edzerd gäih soll.
Draußn vo dä Dür woarn di Daggl leis. Blouß iich hobbs kläffm hörn wäi asunsd. Aff Mord und kabudd hamm dey runderbelld mied ihrene haasern Häls und sinn gecher di Dür grumbld, bisd denkd hosd, des Haus schdürzd zamm.
Gärcherd hobbi mi nu an ganzn Ahmd – obber ned wecher der und maaner ewichn Froocherei. Sondern deswehng, dassd wecher dem saane Förz aa nu suu lang schbäder äs Schdreidn oofängsd.
