Wos mei Oma dä Weld schon nu mieddeiln wolld
Deil 2: Verbindung nach ohm
»Ob iich än heilichn Andonius kenn, froochd der miich? Mied dem binni ja scho per Du. Wissd ihr des, wie der änn Opa sei Brilln gfundn hodd?!
Mir woarn in Igglheim, bamm Leo, änn Kriegskamaradn vom Vadder, und hamm am Nachmiedooch änn klanner Vädauungsschbaziergang gmachd. Irchendwie muss sich der Opa buggd hamm – und di Brilln fläichd naus. Kanner hodd wos gmerkd. Erschd am Ahmnd, wie mä widder dahamm woarn, simmä dahinderkommä.
Wos is uns übri bliehm, als am Sunndooch draff widder nach Igglheim zu foahrn?
Nachm Middochessn is dann glei losgangä. Mir sinn im Wald umerernanderdiecherd und hamm gsuchd wie di Weldmassder. Alles vergehms, kannä is fündich woarn, weder dä Leo, der si großzügicherweis bereid erklärd hodd und miedgangä is, noch der Vadder, noch iich.
Nachdem mir zwaa Schdund blindlings am Bodn umerernandergsuchd hamm, hobbä mä denkd, edz gibbds blouß nu anns: änn Andonius. Iich bin schdehbliehm und hobb bedd: ›Heilicher Andonius, wennsd mä hilfsd die Brilln zu finden – also drei Vaterunser sinn dä sicher!‹
Wos soll i sohng, iich geh drei Schridd, schau nunder – do lichds, im Gras zwischn zwaa Äsd verschdeggd. Edz hobbis alle zammdrommeld und ihnen di Gschichd verzähld. Und dann hammä glei mei Verschbrechn eihglösd. Ja, auf den Andonius is hald Verlass.
Und dä Vadder, wissdä, wos der gsachd hodd: ›Die Mudder‹, hodder gsachd, ›die hadd Verbindung nach ohm.‹«