In maaner Eingschafd als Zivi.
Dexde zum Dehma Budzn.
Deil 3: Unnödiche Sauberkeid
An di Miedwoch binni manchmol bei derer tädich, die ihr Wohnung vull Gruuschzäich hodd, obber si aa ned drennä konn vo dem Graffl, denn »ä Griech«, wies maand, »is bisher nu alle fuchzg Joahr vurkummä.«
Wie iich äs erschde Mol bei ihr gwesn bin, hobbis hald scho brobierd und sie gfroochd, obbi äweng Ordnung machn und des Gwerch derwall aff änn großn Haufn in ä Eggn ins Wohnzimmer schlichdn därff.
»Naa«, hodds gsachd und di Händ zammgfald, »biddschön ned, des brauch i alles, wies edzädd doo schehd.«
Also hobbi zum Wischn oogfangd, miich gärcherd und ä halbe Schdund länger brauchd wieäsunsd. Dä Bus, dä Neunävierzgä, der zur Zendrohle fährd, is zwischenzeidlich natürlich wech gwehn und iich bin ä Vierdelschdund umerernandergsessn, obwohl mir dä nächsde Einsatz scho aff die Nägl brennd hodd.
Ä Wochn schbäder binni widder bei derer eideild. Walli scho gwussd hobb, was miich erwardn dudd, hobbi mi vurher mendahl draff eigschdelld. Dabei is alles ganz anders kummä.
»Ihre Kollechn«, maands und schaud miich verschdörd oo, »hamm mit mir änn Schbaziergang gmachd und danooch woar di Wohnung leer.«
Eibrochn werd wohl kanner sei, hobbi mä heimli denkd und mei Ärberd verrichd, ohne dass mä ä bisslä gfalln hädd.
